अर्हेरनवरगांव शेतशिवारात पट्टेदार वाघाचे दर्शन
परिसरातील शेतकरी व नागरिकांमध्ये भीतीचे वातावरण
ब्रम्हपुरी/का.प्र.
ब्रह्मपुरी तालुक्यातील अर्हेरनवरगांव, भालेश्वर ही गावे वैनगंगा नदी किनारी वसलेली आहेत. या भागात उन्हाळी धान पीकाची लागवड केली असून या शेतशिवारात पट्टेदार वाघाचे दर्शन काही शेतकर्यांना झाले. त्यामुळे परिसरात भीतीचे वातावरण निर्माण झाले आहे.
वाघाचे दर्शन झालेल्या शेतकर्यांनी आरडाओरड केल्यामुळे मोटार पंप सुरू करणारे, औषधी फवारणी करणारे ,खत मारणार्या शेतकर्यांनी आपली हातची कामे जशीच्या तशी टाकून शेतामधून पळ काढला. वाघ आला रे आला अशी बोंब गावात पसरताच गावकर्यांनी वाघ ज्या धानाच्या शेतात बसून आहे त्या दिशेने धाव घेतली आणि त्याला पाहण्यासाठी गर्दी केली.
अर्हेरनवरगांव शेतशिवारात वाघ आला याची माहिती ब्रह्मपुरी येथील वनविभागाला देण्यात आली असता वनविभाग अधिकारी सेमस्कर व सैय्यद आपल्या ताफ्यासह घटनास्थळी दाखल झाले. कोणत्याही प्रकारची अनुचित घटना घडू नये म्हणून ते वाघावर बारीक लक्ष ठेवून आहेत. अर्हेरनवरगांव व आजूबाजूचा परिसर हा जंगल व्याप्त नसूनसुद्धा मागील वर्षीपासून जनतेला पट्टेदार व बिबट वाघाचे दर्शन घडत आहे.
